1995 жылы 30-тамызда Қазақстан халқының мақұлдап, дауыс беріп, қолдауымен жаңа Ата Заңымыз қабылданды. Еліміздің басты бағытына айналған Конституциямызға 30 жыл толып отыр.
Осы орайда, бүгін аудандық мәдениет үйінде Конституция күніне арналған салтанатты жиын өтті. Алдымен аудандық мәдениет үйінің алаңынан басталған шеру мәдениет үйінің сахнасына қарай беттеп, ішке салтанатты жағдайда енгізілді. Шара Мемлекеттік Әнұранмен ашылды. Мұнан соң «Бабадан қалған сара жол» атты видеоролик көпшіліктің назарына ұсынылды. Салтанатты жиынға қатысқан аудан әкімі Сәкен Мамытов құттықтау сөз сөйлеп, Ата Заңымыздың еліміз үшін басты құжат екендігін айтып, барша аудан тұрғындарын айтулы мерекемен құттықтады. Ауданымыздың экономикалық — әлеуметтік дамуына сүбелі үлесін қосып жүрген бірқатар азаматтар «Ауданға сіңірген еңбегі үшін» төсбелгісімен, аудан әкімінің Құрмет грамотасы және Алғыс хаттарымен марапатталды.
Кеш концерттік бағдарламаға ұласып, аудандық мәдениет үйінің әншілері әуелете ән шырқаса, «Айжанқыз» халықтық бишілер ұжымы мың бұрала биледі. Сонымен қатар, Жаңатас қалалық балалар өнер мектебінің өнеріне халық қошеметтерін білдірді. Салтанатты жиынға Тараз қаласынан арнайы «Номад» тобы әннен шашу шашып, көпшіліктің ықыласына бөленді.