Оның айтуынша, болған екі оқиғаның бірінде бала жол қозғалысы ережесін сақтап, жаяу жүргіншілер өткелімен өткен. Сол сәтте анасымен кездесуге келе жатқан қыз бала жолды белгіленген жермен кесіп өтпек болған. Алайда қайғылы жағдай дәл анасының көз алдында орын алған. Бала ешқандай ережені бұзбаған.
«Ал екінші жағдайда бала жолды рұқсат етілмеген жерден кесіп өткен», – деді Сұлтанбаев.
Ол екі оқиға бойынша да қылмыстық іс қозғалғанын және тергеу аясында барлық жауапты тұлғалардың әрекетіне құқықтық баға беріліп жатқанын атап өтті.
«Заң аясында кінәлілердің бәрі жауапқа тартылады. Қыз бала жаяу жүргіншілер өткелімен өтіп бара жатқан. Бірақ ол жол бермеген автобустан қорқып, артқа шегінген. Сол сәтте артында тұрған жүк көлігінің жүргізушісі оны байқамай қалған. Қыз жүк көлігінің «көрінбейтін аймағында» тұрған. Өздеріңіз білетіндей, мұндай көліктер биік, ал жүргізушінің көру аймағы шектеулі. Салдарынан бала дөңгелектің астында қалып қойған», – деп түсіндірді комитет басшысы.
Сонымен қатар, Қайсар Сұлтанбаев жаяу жүргіншіге жол бермеген автобус жүргізушісі де жауапқа тартылғанын айтты.
«Қылмыстық іс шеңберінде қосымша шешімдер қабылданады», – деді ол.
https://turkystan.kz/article/258274-almatyda-zuk-koligi-qaqqan-7-zasar-qyzdyn-olimi-avtobus-zurgizusisi-zazalanatyn-boldy