Қазақстанда мыңдаған жеке кәсіпкер бизнес-гранттардан қағылуы мүмкін: билік талаптарды қатаңдатты
Негізгі өзгерістердің бірі – жеке кәсіпкерлерге қойылатын талаптардың күшеюі
Жаңартылған қағидаларға сәйкес, әлеуметтік осал топтарға жататын азаматтар мен жастардың грант алу құқығы сақталады. Бағдарламаға қатысу үшін азамат жұмыссыз ретінде немесе жеке кәсіпкер ретінде тіркелуі, Skills Enbek платформасында «Бастау Бизнес» бағдарламасы бойынша оқудан өтуі, бизнес-жоспар әзірлеуі, Business Enbek порталы арқылы өтінім беріп, аудандық немесе қалалық комиссия алдында жобасын қорғауы қажет.
Негізгі өзгерістердің бірі – жеке кәсіпкерлерге қойылатын талаптардың қатаңдатылуы. Бұған дейін грантқа үш жылдан аз уақыт бұрын тіркелген жеке кәсіпкерлер үміткер бола алса, енді бұл мерзім бір жылға дейін қысқартылды. Бұл мемлекеттік қолдауға үміткерлердің санын айтарлықтай азайтуы мүмкін.
Сонымен қатар, грант беруден бас тартуға негіз болатын себептердің тізімі кеңейтілді. Енді бұған дейін мемлекеттік грант немесе микрокредит алған азаматтар, мерзімі өткен берешегі бар кәсіпкерлер, зейнет жасындағы адамдар, қолданыстағы еңбек шарты бар жеке кәсіпкерлер, сондай-ақ соңғы алты ай ішінде кәсіпкерлік қызметін тоқтатқан тұлғалар қолдауға ие бола алмайды.
Сондай-ақ банкроттық немесе тарату рәсімінен өтіп жатқан, қажетті лицензиялары жоқ, терроризм мен экстремизмді қаржыландыруға қатысы бар тұлғалар тізіміне енгізілген азаматтарға да грант берілмейді.
Өзгерістер грант қаражатын пайдалану тәртібіне де әсер етті. Енді грант қаражатын тек қолма-қол ақшасыз нысанда жұмсауға рұқсат етіледі. Сонымен бірге қаражатты шетел валютасын, бағалы қағаздарды және цифрлық активтерді сатып алуға пайдалануға тыйым салынады.
Тағы бір жаңашылдық – есептілік мерзімінің ұзартылуы. Бұған дейін грант иегерлері бір жыл ішінде есеп тапсырса, енді олар 24 ай бойы әр тоқсан сайын есеп беруге міндетті.
Сондай-ақ грант алушылар мемлекеттік қолдау алғаннан кейін 18 ай ішінде кемінде бір тұрақты жұмыс орнын құруы тиіс. Бұл жұмыс орнына мансап орталығы жолдаған азаматты қабылдау қажет. Шарт талаптары бұзылған жағдайда еңбек мобильдігі орталығы келісімшартты бұзып, бөлінген қаражатты, оның ішінде сот тәртібімен де, қайтаруды талап ете алады.
Бағдарламаның ашықтығын арттыру мақсатында еңбек мобильдігі орталықтары жыл сайын 10 сәуірге дейін грант алған азаматтар, қаржыландырылған жобалар, төленген қаражат көлемі және құрылған жұмыс орындарының саны туралы ақпаратты жариялап отыруы тиіс.
Жаңа қағидаларда конкурстық комиссиялардағы мүдделер қақтығысының алдын алу шаралары да бекітілді. Комиссия отырыстары міндетті түрде аудио және бейнежазбаға түсіріледі.
Бұдан бөлек, құжаттан микроқаржы ұйымдары арқылы микрокредит беру туралы ережелер алынып тасталды. Ал «Еңбек нарығы» автоматтандырылған ақпараттық жүйесі АЦЖ «Еңбек нарығы» цифрлық жүйесі болып қайта аталды.
фото: Pixabay