АУДАН ӘКІМІ ДОСБОЛ АУЫЛЫНДА БОЛЫП, ТҰРҒЫНДАРДЫҢ ӨТІНІШТЕРІН ТЫҢДАДЫ

Аудан әкімі Сәкен Мамытов жұмыс сапарымен Досбол ауылында болды. Ауылдағы барлық әлеуметтік нысандарды аралап, жағдайы мен қысқы мезгілге дайындығын қарап шықты. Ауыл тұрғындарымен кездесіп, ауылдықтардың көкейлерінде жүрген өзекті мәселелерін тыңдап, өзара пікір алмасты.

Ауыл тұрғындары жайылымдық жер, мал шаруашылығына қатысты мәселелерді көтерді.

Елді мекенге жайылымдық, шабындық жерлерді бекітіп беру, орман шаруашылығы иелігіндегі жерлерді пайдалану, Талас өзенінің ауылға жетуін қадағалау мәселелерін көтерді.

Ауылдағы медициналық пункттің жұмысы мен дәрігер мәселесі де көтерілді.

Тұрғындар өтінішін мұқият тыңдаған аудан әкімі Сәкен Үмбетұлы көтерілген мәселелерді шешу жолдарын қарастыру үшін сала басшыларына және ауылдық округ әкіміне тапсырмалар берді.

Сәкен Үмбетұлы сапар барысында ауылды көгалдандыру, жарықтандыру, ағаш отырғызу, аулаларға гүл егіп, көшелердің тазалығын баса назарда ұстауды тапсырды.

Сонымен қатар, аудан басшысы округте бірқатар әлеуметтік нысандарды аралау барысында кездескен кемшіліктерді ретке келтіру бойынша округ әкімі бөлімдермен жұмысты жүйелендіру керектігін жеткізді.

Сарысу ауданы әкімдігінің баспасөз қызметі.