“Тарлан” спорт кешені мемлекет меншігіне берілді
Жамбыл облысы Шу ауданында 2016 жылы бой көтерген “Тарлан” спорт кешенін Қазақстандық бокс федерациясы № 37 балалар-жасөспірімдер спорт мектебінің теңгеріміне өткізіп берді. Салтанатты шарада Қазақстандық бокс федерациясының атқарушы директоры Маратбек Мықтыбеков нысанның символикалық кілтін облыс әкімдігінің дене шынықтыру және спорт басқармасы басшысының орынбасары Нұржан Жолдасбековке ресми түрде тапсырды.
Айтулы шарада аудан әкімі Бақытжан Жәнібеков әкімдік тарапынан Қазақстандық бокс федерациясының басшылығына алғыс білдірді. Айта кету керек, спорт кешенінде бұған дейін еңбек етіп келген жаттықтырушылар мен спортшылар әрі қарай да өз жұмысын жалғастыратын болады. Спорттық сауықтыру блогы мен жатақханадан тұратын екі қабатты нысанда аудан жастары спорттың дзюдо, таеквондо, бокс және күрес түрлері бойынша тегін жаттыға алады. Оған қоса, кешеннің ауласындағы жасанды жабындысы бар футбол алаңшасы мен гимнастикалық алаңдардың да есігі аудан тұрғындары үшін әрдайым ашық екенін айта кеткен жөн.
Жамбыл облысының әкімдігі