Елжан Біртанов жаңа қызметке тағайындалды

Бұрынғы денсаулық сақтау министрі Елжан Біртанов QazMed медицина және онымен сабақтас салалар қызметкерлерінің кәсіподағында кеңесші қызметін атқаратын болды деп хабарлады turkystan.kz Ulysmedia.kz сайтына сілтеме жасап.

Экс-министр кәсіподақ мүшелерімен бірге медицина мәселелерімен айналыспақ. Оның айтуынша, салада кадр және еңбекақы проблемасы әлі де өзекті.

Еске салсақ, өткен жылдың қазанында экс-министр Елжан Біртанов пен оның орынбасары болған Олжас Әбішев қылмыстық кодекстің 361-бабы (лауазымдық өкiлеттiктерді теріс пайдалану) бойынша кінәлі деп танылып, Біртанов 5 жылға, Олжас Әбішев 4 жылға бас бостандығынан шектеу жазасына кесілген. Оларға мемлекеттік қызметпен айналысуға өмір бойына тыйым салынады. Сондай-ақ ескертусіз мекен-жайын өзгертуге болмайды.

Елжан Біртанов пен бұрынғы вице-министр Олжас Әбішевке Денсаулық сақтау министрлігінің жұмыс істемейтін ақпараттандыру платформасын қабылдап, іске қосу арқылы қызмет бабын асыра пайдаланды деген айып тағылған болатын. Осы платформа бойынша орындалмаған жұмыстың құны 4,5 млн доллар немесе 1,5 млрд теңге деп танылды.

2022 жылғы 9 қарашада Елжан Біртановтың адвокаттары сотқа апелляциялық шағым түсірді.

Өткен жылдың соңында қазақстандық дәрігерлер Елжан Біртановты қылмыстық қудалауды тоқтату туралы петиция жариялаған.

Өткен айда апелляциялық cот алқасы Елжан Біртанов пен Олжас Әбішев ісіне қатысты шешім шығарып, шыққан үкімді өзгеріссіз қалдырған еді.

https://turkystan.kz/article/216533-elzhan-birtanov-zhana-kyzmetke-tagayyndaldy/