Астана тұрғыны жалған көлік ұтысына алданып, 4,6 миллион теңге берген

Криминалдық полиция басқармасының қызметкерлері анықтағандай, 23 және 24 жастағы екі алаяқ интернет-дүкеннің тұтынушылар базасына қол жеткізген. Осыдан кейін өздерін дүкен қызметкері ретінде таныстырып тұтынушыларға телефон соғып, көлік ұтып алғандарын хабарлаған.

Алаяқтар тұтынушыларға көлікті алу үшін жарна ретінде белгілі бір соманы төлеу керектігін жеткізген. Жәбірленушілер 700 мың теңге немесе одан да көп ақша жіберген. Алайда акцияға қатысушыларды жағымсыз тосынсый күтіп тұрды: ешқандай көлік ұтысы болған жоқ. Олардың құрбандарының бірі елорда тұрғыны, 4 миллион 650 мың теңге жіберген.

Қазіргі уақытта алаяқтар интернет-алаяқтықтың 14 фактісі бойынша күдікке ілінген.

«Күдіктілер Астана қалалық полиция департаментінің уақытша ұстау изоляторына қамалды. ҚР Қылмыстық кодексінің 190-бабы бойынша тергеу амалдары жүргізілуде. Сондай-ақ олардың елордада осыған ұқсас қылмыстарға қатыстылығы анықталуда», — деді Астана қалалық полиция департаменті Криминалдық полиция басқармасының бастығы Дастан Қалиев.