Жамбыл облысында күн электр станциясы қуаттылығын екі есеге арттырды

531

Жамбыл облысының Жуалы ауданында орналасқан күн электр станциясы биыл екінші кезеңнің құрылысын аяқтап, жазда іске қосқан болатын.

Небәрі төрт айдың ішінде қуаттылығы 50 мвт-ты құрайтын «Бурное Солар-2», 40 миллион киловатт сағат электр қуатын өндірді. Осылайша, екі станцияны қоса алғандағы қуаттылық 100 МВт-ты құрап, Орталық Азиядағы ірі күн генерациясы нысандарының біріне айналды.

Күн электр станциясының өндірістік қуаттылығын арттыру мақсатындағы жобаның екінші нысаны 74 гектар аумаққа орналасқан. Құрылыс жұмыстарына 300-ге жуық жұмысшы тартылып, он айда жүзеге асты. Жобаның жалпы құны – 25 миллиард теңге.

Күн электр станциясында жалпы 377 мың күн панельдері орнатылған. Әрбір тақтайшаның қуаттылығы – 260-270 ватт. Мамандар биыл екі станциядан 150 миллион киловатт сағат электр қуатын алуды жоспарлауда. Ал өндірілген жасыл энергия оны таратумен айналысатын арнайы мекемелерге тасымалданады.

Игорь Кан, күн электр станциясының инженері:

– Екінші жобаның қуаттылығы біріншіге қарағанда, 10 ватқа артық.  Барлық модульдердегі өндірілген электр қуаты 32 шағын станцияға бөлінген, ол жерден кернеулі тоқ тұрақты түрде трансформатор арқылы 220 киловаттық шағын станцияға кеп түседі.

Алпауыт күн электр станциясы 224 гектар алқапты алып жатыр, мұнда сағатына шамамен 100 мегават өнім өндіріледі. Бұл – 70 мың үйге жететін қуат көзі.

Ал 2020 жылға қарай мұндай нысандардың саны тағы артып, Жамбыл облысы өз қажеттілігінің 60 пайызын баламалы қуат көздерінен алады деп күтілуде.

24.kz

Leave A Reply

Your email address will not be published.