Әлемдік геосаясат, жаhандық экономика жаңа өзгерістерге икемделе бастады. Осы кезге дейінгі қағидаттар жаңа сипатқа көшуде. Біздің еліміз үшін де тың мүмкіндіктер мен тәуекелдердің пайда болары шындық. Осы тұрғыда мемлекеттік саясат пен стратегиялық ұстаным қалай болмақ?
Бүгін Мемлекет басшысы Қасым-Жомарт Тоқаевтың Turkistan газетінде жарияланған сұхбаты — осы маңызды сұрақтарға жауап береді.
«Тегіс жолдың өзінде тосқауыл бар» деген шығыс халықтарының сөзін келтіре отырып, Президент күрделі мәселелерге де тоқталады: «Бұл – ең алдымен, инфляция деңгейінің жоғары болуы. Соның салдарынан азаматтарымыздың әл-ауқатын арттыруға арналған еңбектің бәрі текке кетіп жатыр. Биыл Үкімет пен әкімдер мемлекетіміздің әлеуметтік-экономикалық тұғырын нығайту үшін көп жұмыс істеуі керек.
Халықаралық сарапшылар Қазақстанның «орташа табыстар қақпанына» түсіп қалғанын дұрыс байқап отыр. Ашығын айтайын, бұл – экономика туралы оқулықтан алынған жалпылама ұғым емес, күн сайын көптеген азаматымыздың басынан өтіп жатқан өмір шындығы. Жұрт табыс тауып жатыр, тіпті, жақсы табыс табатындар да бар. Бірақ, оның бәрін инфляция жеп қояды немесе ипотека төлеу, балаларды оқыту, ата-анаға көмектесу сияқты күнделікті тірлікке жұмсалып, жоқ болып кетеді…»
Президент елді Цифрлық державаға айналдыру мәселесіне де арнайы көңіл бөлген:»Жасанды интеллект пайда болғаннан бері болашақтың кемесіне мініп үлгеретін елдер мен ескі заманда қалып қоятын елдердің арасы алшақтай бастады. Сондықтан, мен цифрлық технологиялар мен жасанды интеллектіні Қазақстанның даму жолындағы басым бағыт деп жарияладым». Президент айтып өткендей, цифрлық держава болудың негізі — адами капитал. Осыны ескере отырып, біздің Павлодар педагогикалық университеті де елге қажетті сапалы педагог кадрларды даярлауды мақсат тұтады. Мықты маман тәрбиемен де, біліммен де, ғылыммен де толыққанды сусындауы тиіс. Осы бағытта жүйелі жұмыс жасап жатырмыз.
Қазақстан бәріміздің ортақ үйіміз. Оның берекелі, жайлы, тыныш болуы, әлемдік өркениетпен бірге ілесе жүруіне баршамыз да мүдделіміз!