САРЫСУДА АЙШЫҚТЫ МЕРЕКЕ АТАЛЫП ӨТТІ
Ұлтымыздың орындалған ұлы арманы Еуразияның жүрегі, арайлы Астанамыз болашаққа қанат қағып келеді. Зәулім үйлер көк аспанмен таласып, биік ғимараттар бой көтеруде. Айбынымен айшықталған еңселі Елорда күні еліміз бойынша мемлекеттік мереке болып аталып өтеді. Бас қалаға басты назарды бұрылып, аталмыш мереке еліміздің түкпір — түкпірінде аталып өтіп жатыр.
6 шілде — Астана күнінде аудандық мәдениет үйінің алаңында «Жаса, жайна, Астана»атты мерекелік концерт өткізілді. Алаңда жиналған халықтың қарасы мол болды. Тұрғындар көтеріңкі көңіл күйде ашық аспан астында ұйымдастырылған кешті қарсы алды. Алаңда еңселі Елордаға арналған кітап көрмесі қойылды.Шараға аудан әкімі Сәкен Мамытов қатысып, құттықтау сөз сөйледі: — Астана- Қазақстанның зор қуаты мен бұла күші. Бұл отандастарымыздың ізгі үміті ақталып, бақыт жолына бастайтын арман қала» деген өр сөзі бар. Бұл егемен еліміздің ішкі және сыртқы саясатының стратегиялық ордасының айнасындай болып отырған Астана қаласына берілген берен баға. Сондықтан да, Көк байрағы көк күмбездің ұшар басында көкке желбіреген Астана бүгінде рухымыздың өрі, ұлтымыздың төріне айналды. , — деп жылы лебізін білдірді. Мұнан соң аудан басшысы «Мерейлі отбасы-2026» ұлттық конкурстың ауданаралық жеңімпаздары атанған І — орын Кемаловтар отбасы, ІІ — орын Ускенбековтер отбасы және жүлдегерлеріне арнайы марапаттауларды тапсырды.Әнмен әуелеп, күймен көмкерілген шарада аудандық мәдениет үйінің әншілері өнер көрсетіп, көпшіліктің ықыласына бөленді. «Айжан қыз» халықтық бишілер ұжымы мың бұрала билегенде кештің сәні кіріп, мерекелік сәт жандана түстІ.